展望和期望不同, 展望是預測, 期望是靠運氣, 所以展望有權威性, 期望就比較卑下。
由於風水師的展望是計農曆, 所以, 踏入08年的展望, 就有一眾大人物負責。
特首: 香港會有普選, 不過要唔好同阿爺嘈交。
超人: 香港樓價一定好。
四叔: 年頭30000回點, 年中33000點。
賭王: 40000點黎緊。
但坊間講得最多既係, 一定要上街爭普選, 越多人上街, 阿爺俾既 jetso 越多, 港股直通車即刻會大大份送比香港人, 仲有QDI I., 一於同阿爺攞盡jetso , 莫講40000點, 45000點都有得玩 !
所以展望今年, 香港人應該會繼續炒炒炒, 如果冇40000點, 一係就賴唔夠多人上街, 一係就鬧反對娑搞搞陣, 激嬲阿爺派少左免費午餐。
by doodoochang
過時過節, 一定有金多寶, 每次都一定人山人海
作為六合彩的忠實fans, 我從來不會錯失捧場機會, 正如逢年三十或者平安夜要出街一樣, 每次金多寶我都會重鎚出擊。
我的六合彩策略是這樣的:
1. 彩池低於3000萬, 我只會少少地用$ 5下注, 當然la, 為免忘記落注, 我會以一次過30期方式購買;
2. 彩池高於3000萬而低於4500萬, 會另外加碼一張7個字和一張電腦
3. 高於4500萬, 一於搏老命, 一張7個字及一張8個字
上述策略, 我已經持之以恆投資了10年, 機會是留給最有紀律的人, 我深信, 我越來越接近發達了。
BY doodoochang
從前, 蛇王只限是兩類人的專利, 一是有房坐的, 二是負責外勤。
有房坐的自然可以在房內傾電話、訓覺、睇馬經, 而且位高檯重, 有人發現亦冇人敢告發; 外勤出左街山高皇帝遠, 鐘意點蛇就點蛇, 你可以試下各大寬頻公司的維修人員, 永冇在每節的中間時段出現, 一定早到, 未夠2:00上門, 可以2:30走但上報用戶麻煩, 要3:30先走, 一日做一兩個客就收工。
至於其餘閒雜人等的蛇王方法, 最多只是傾多10分鐘電話去多兩轉廁所, 蛇極有個譜。
不過自從資訊科技革命開始, 蛇王變得眾生平等, 人人一部電腦就可以駁通全世界, 返工唔駛打電話只需手指按按玩msn上newsgroups, 8小時工作最多只有2小時是處理公務, 老細由大房行出來, 大家最一致的行動是switch windows。全人類一齊上網做自己野。
當然, 近期的所謂自己野, 十個有8個是上網買股票。
by doodoochang
新官上任, 即遇強敵, 無牌領隊格蘭的如意算盤是, 只要不大敗, 就可減輕自己的壓力, 如果守和有一分, 又或者偷雞成功, 當然攞彩。
於是一開波, 車路士的出賽陣式是4-5-1(或者是4-1-4-1), 中場屯重兵, 加上一個單箭頭舒夫真高, 擺出一副求和格 : 但求中場穩守, 擠壓曼聯的中場活動空間, 再求舒夫真高,打突擊。
如此陣式, 未打先認輸。
比賽進行中, 才發現格蘭冇乜料到:用馬基利尼做防守中場無問題, 馬基利尼前面有艾辛掃盪, 再加上兩側有馬路達和祖高爾, 前面有一個米基爾支援舒夫真高, 如此選擇亦是正路, 但踢起上來, 竟然亂七八糟。究竟, 更衣室內有冇討論過進攻模式 ? 中場轉接由誰負責 ? 兩邊側擊是如何開展? 進攻路線圖是怎麼樣的 ? 對不起, 通通欠奉。
有陣式, 冇戰術, 是今場車路士的最佳寫照, 所以車路士中場今場陷於被動, 球員不停努力走動, 不斷破壞破壞, 但每當控球時, 卻無法做出有效反擊, 三兩下, 又會被曼聯搶回控球權。
再講一次, 今場車路士的部署, 是”有陣式, 冇戰術”! 如此戰術水準, 任何一個業餘球迷, 都應該即刻去車路士應徵做領隊。
至於曼聯, 今場表現又不是太好。雖然是2:0, 但中前場實在大有改進空間(中後場冇受過壓力, 可以不提)。一如以往, 曼聯中場以活力和速度搶得控制權, 前鋒以朗尼為最前殺手, 但泰維斯就全場隱型, 似乎是在遷就朗尼的走位, 結果自己被擠壓在史高斯和朗尼之間, 無所適從。觀乎今場, 曼聯無法建立一套有效的進攻模式, 中後場運作冇問題, 但去到前場就無法有效推進, 費格遜應該要認真諗諗。
題外話一, 今日睇財經大報的足球版, 竟然話曼聯在下半場被車路士逼得寸步難行, 還要於縮於後場橫傳拉布云云, 是不是那晚有兩場曼聯大戰車路士 ?睇波, 真係要自己親眼睇先算。
題外話二, 有人認為米基爾出場那個判罰過嚴, 但慢鏡所見, 米基爾飛鏟之際, 鞋底向上, 明顯是蓄意傷人; 至於那記12碼, 賓希姆用腳踢跌沙夏, 雖然力度不大, 但卻實實在在踢跌人, 為什麼會是不公判決, 有懷疑者, 睇例書丫, 唔該。
題外話三, 全場最差, 賓希姆高票當選。
最愛柏金雲巴士頓對荷蘭隊無好感、喜愛返工討厭馬房文化唯有開開心心返工做足100分地等退休的資深業餘球迷。
退休後最大心願是閒來可以學氣功學書法學結他買套靚HiFi日日聽音樂看電影每年去兩次旅行、隨意讀幾個比較文學同藝術課程、買一套阿仙奴季票穿州過省看齊全季所有主客賽事(如果雲加尚在)。
退休後應該會忙死。
Welcome to WordPress.com. This is your first post. Edit or delete it and start blogging!
